kab uskaa visaal chaahiye thaa -Jaun Elia

kab uskaa visaal chaahiye thaa

kab uskaa visaal chaahiye thaa
bas aik Khayaal chaahiye thaa

(visaal : union)

kab dil ko javaab se Gharz thii
hoNToN ko savaal chaahiye thaa

shauq ek nafas thaa aur vafaa ko
paas-e-maah-o-saal chaahiye thaa

(nafas : moment; maah-o-saal : months and years)

ek chehraa-e-saadaa thaa jo hamko
be-misl-o-misaal chaahiye thaa

(be-misl-o-misaal : incomparable)

ek qarb meN zaat-o-zindagii haiN
mumkin ko muhaal chaahiye thaa

Jaun Elia

Leave a Reply